LABARI: Nenadi Usman za ta karbi ragamar sakatariyar jam'iyyar Labour ta kasa

Shugabar riƙo ta ƙasa ta jam'iyyar Labour, Sanata Nenadi Usman, za ta karɓi ragamar sakatariyar jam'iyyar a hukumance a Abuja.

Usman za ta zama shugabar ƙasa mace ta farko a wata babbar jam'iyyar siyasa ta Najeriya.

Sakatariyar, wadda take a gundumar Utako, Abuja, ta kasance ƙarƙashin ikon ɓangaren jam'iyyar da Julius Abure ke jagoranta har zuwa lokacin da Hukumar Zaɓe Mai Zaman Kanta ta Ƙasa, INEC, ta amince da Usman da tawagarta a hukumance.

A lokacin da ake gabatar da wannan rahoton, ana ɗaga tuta mai ɗauke da hotunan Usman da mukaddashin Sakataren Ƙasa, Sanata Darlington Nwochocha, a kusa da ginin a shirye-shiryen wani taron da ke nuna farkon sabon zamani.